Македонски
Shqip
English
ЦИВИЛ - Центар за слобода со претпазлив оптимизам го пречекува постигнатиот договор меѓу четирите партии, потписнички на Договорот од Пржино, денеска во Клубот на пратеници во Скопје.
ВМРО-ДПМНЕ, СДСМ, ДУИ И ДПА, во присуство на американскиот амбасадор Џес Бејли и на претставникот на Делегацијата на Европската uнија во Македонија, Тиборг Бароди, се договорија за следните детали:
-Во поглед на Избирачкиот список, Изборниот законик ќе биде изменет до 22 јули. Во однос на договореното, 171.500 гласачи ќе бидат ставени на посебна листа и нивниот глас не е спорен.
Што се однесува на речиси спорните 39.502 гласачи од вкрстените проверки, ќе имаат 25 дена самите да се пријават за гласање. Оние кои нема да се пријават, нема да имаат ни право на глас.
-Во однос на медиумите, Законот за Агенција за аудио и аудиовизуелни медиумски услуги ќе биде имплементиран 15 дена од датумот на денешниот договор. Ќе биде формирано ад-хок тело за мониторирање на медиумското известување, согласно со Изборниот законик. Ова тело ќе функционира до завршување на изборниот процес, а ќе биде формирано 30 дена од датумот на овој Договор.
Ова тело ќе биде составено од 5 членови, во консултации со релевантните професионални организации. Четирите политички партии ќе одберат четири членови, од кои, едниот ќе биде Албанец. Избраните четворица имаат 15 дена со консензус да го одберат петтиот член. Телото ќе врши проценка на балансираното известување.
Првиот прекршок, ќе биде санкциониран со предупредување, а евентуалниот втор, сноси парични казни. Ниту еден новинар или медиум нема да биде казнуван за искажување на свое мислење, кое пак, според договореното, треба да се разликува од пласирање на информација.
-Четирите политички партии се обврзуваат да спроведат медиумска легислатива, согласно со итните реформски приоритети и Извештајот на Прибе, во рок од шест месеци по изборите.
Во согласност со другите партии, најголемата опозициска партија ќе номинира уредник на Информативната редакција на МРТВ, од експерти на ова поле.
Ако партиите потврдат дека услови за избори има, новиот уредник на јавниот сервис ќе стапи на функција сто дена пред избори.
-Во однос на пржинската Влада, ако изборите се одржат во 2016 година, таа ќе добие мандат 100 дена, пред денот на изборите. Законските решенија донесени од страна на ВМРО-ДПМНЕ и на ДУИ, коишто се однесуваат на Министерството за внатрешни работи и ингеренциите на министерот, се суспендираат до први јануари 2017 година.
Кадровските промени на министерот за внатрешни работи се лимитирани до 15 лица на раководни позиции и можност на десет проценти од бројот на хоризонтални поместувања, кои актуелната власт ги направила од 2013 и 2014 година.
-Во однос на Специјалното јавно обвинителство, во случај Уставниот суд да одлучи дека Законот за Специјалното обвинителство или дел од него е неуставен, четирите партии се обврзуваат да го усогласот Законот со одлуката на Судот и повторно да ја формираат Канцеларијата, според оваа одлука, во рок од 5 дена. Мора да се задржат ефикасноста, фокусот и целите на СЈО.
Четирите партии го повикаа Уставниот суд да донесе одлука во однос на Законот за СЈО, што е можно побрзо на следната седница.
ЦИВИЛ Центар за слобода свика состаноци на своите работни тела и експертски тимови и веќе утре ќе излезе со подетални анализи и ставови за постигнатиот договор на партиите потписнички на Договорот од Пржино.
Неодамна ЦИВИЛ ја објави тријазичната публикација „Слободни избори: Услов за кој не се преговара“, во која на 180 страници објавува извештаи и анализи за сите аспекти на кризата.
