Семинар на ЦИВИЛ за транспарентноста, одговорноста и разочарувањата

Заинтересираните граѓанки и граѓани од Вардарскиот и Источниот регион, претставниците на граѓански здруженија и јавната администрација покажаа голем интерес за дводневниот семинар на ЦИВИЛ за транспарентност и одговорност во политичките процеси кој се одржа во хотел „Романтик“, на брегот на езерото „Младост“, на 14 и 15 август. Ова беше семинар на кој говорниците открија низа ексклузивни податоци, за кои во наредните денови ќе се објавуваат низа видео содржини и текстови.

На отворени сесии за јавноста, како специјални гости на семинарот беа поканети и говореа претседателката на Државната комисија за спречување на корупција (ДКСК), Билјана Ивановска, градоначалникот на Општина Велес, Аце Коцевски, активистот за човекови права и поранешен советник во Министерството за финанции, Бранимир Јовановиќ, како и Џабир Дерала, претседателот на ЦИВИЛ.

Според првата антикорупционерка, Билјана Ивановска, највисок процент на корупција има во судството поради наменските судски одлуки и тоа е најслабата карика во борбата со корупцијата во државата. Вработувањата во државните институции се на второ место, покажаа анализи и анкети со граѓаните на Државната комисија за спречување на корупцијата. Во моментов ДКСК анализира 180 институци во државата со цел точно да утврди колку граѓаните ги чинат привелигиите на функционерите.

Иако настапот на Ивановска беше предвиден да трае најмногу 90 минути со вклучена дискусија од учесниците, оваа сесија траеше повеќе од три часа.

Меѓу другото, излагањето на Ивановска одеше и во прилог на барањата на ЦИВИЛ во Иницијативата #КрајЗаРасипништвото, за укинување на привилегиите на функционерите. Патните трошоци и апанажата се првите функционерски привилегии што треба да се укинат, смета првата антикорупционерка во земјата, што е дел и од барањата на ЦИВИЛ доставени и до Собранието на РСМ на 17 мај годинава.

Билјана Ивановска, ДКСК (14.08.2019)

На првиот ден од семинарот на граѓанската организација Цивил на тема: „Институциите, медиумите и граѓанскиот сектор заедно во борбата против корупцијата во државата“, што се одржува во Велес, Ивановска, откри дека во изминатите шест месеци дванаесет укажувачи, граѓани и вработени во јавни институции како и во јавните претпријатија, пријавиле случаи на корупција кај овластено лице во Државната комисија. Формираните предмети се во завршна фаза и наскоро ќе бидат соопштени на јавноста.

Градоначалникот на општина Велес, Аце Коцевски, истакна дека вистинска демократија не може да има без развиен граѓански сектор.

Аце Коцевски, Градоначалник на Велес, (15.08.2019)

Како реномиран експерт за финансии и член на Институтот за општествени и хуманистички науки, во својот ексклузивен настап, Бранимир Јовановиќ направи исцрпна анализа на главната тема и односот меѓу ветеното и исполнетото во изминатиот период. Темата на неговото излагање беше: „Одговорност“.

Бранимир Јовановиќ, експерт за финансии, ИОХН

„Одговорност е да преземеш нешто и да се обидеш да направиш некакви промени, а не само да критикуваш. Но, исто така одговорност е да се повлечеш доколку процениш дека нема да можеш да ја постигнеш зацртаната цел и да им отстапиш место на другите“, кажа меѓу другото Јовановиќ во своето излагање. Тој, како и секогаш во своите јавни настапи, говореше искрено и отворено за своето искуство во Министерството за финансии, како советник во кабинетот на екс-министерот Тевдовски. Јовановиќ самиот поднесе оставка на својата функција.

Џабир Дерала, ги презентираше главните цели на проектот „Граѓански објектив: Транспарентност и одговорност во политичките процеси“. Во својот настао, тој жестоко ги критикуваше злоупотребите во доменот на социјалната правда во политички и изборни цели, говореше за грубото кршење на човековите права и гласачкото право во времето на режимот и со остар тон критикуваше состојби и во периодот на сегашната Влада.

Дерала, без заобиколување и со факти претстави конкретни примери во осум области во кои организацијата нотирала злоупотреби на јавните ресурси, како и примери на коруптивно однесување на политичките партии и нивните функционери.

Џабир Дерала – ЦИВИЛ

За време на семинарот, говорниците одговараа на поставените прашања од присутните граѓан(к)и на теми што се од јавен интерес. Голем дел од прашањата предизвикаа извонредно интересни дискусии, а одговорите на гостите беа директни, искрени и отворени и избоилуваа со нови, ексклузивни информации.

На самиот крај од првиот ден од семинарот, учесниците, претставници на граѓанските организации и медиумите, зедоа учество во една вежба што ја водеше Дерала, па гласаа и формираа ранг листа на корумпираност во осумте области за кои говореше тој. Така, според гласањето, највисок процент на корупција во државата има при вработувањето, во тендерските постапки и во јавните набавки, потоа следат медиумите, политичкото финансирање, привилегиите на функционерите, субвенциите, социјалната правда и невладините организации. Ивановска, ДКСК, кој присуствуваше на „гласањето“ го прокоментира резултатот како многу близок до резултатите од анализите на ДКСК.

Во текот на наредните денови, ЦИВИЛ Медиа ќе објави и низа видео материјали од сите излагања и дискусии на учесниците на овој важен семинар.

Семинарот „Граѓански објектив: Транспарентност и одговорност во политичките процеси“ е дел од истоимениот проект, финансиран од National Endowment for Democracy.

Дехран Муратов
Фотографија: Биљана Јордановска