ЦИВИЛ во медиумите

Активностите на ЦИВИЛ - Центар за слобода во текот на изминатиот месец, постојано беа следени и објавувани од локалните и регионални телевизии, како и од Интернет медиумите. Најголем дел од овие активности се поврзани со проектите за долгорочно набљудување на политичките процеси во изборен контекст и за јакнење на јавната свест и граѓанска едукација за гласачките права.

Јавниот настан кој како дел од кампањата „Сите за слободни избори“, кој на 25-ти јануари се одржа во Гевгелија, го проследи порталот GevgelijaNet, кој информираше за активностите на ЦИВИЛ.

Средбата со граѓанките и граѓаните на тема: “Сите за слободни избори”, која се одржа во Охрид, на 30-ти јануари, беше најавена од охридскиот портал Ohridnews.

Покрај најавата, сите локални и регионални медиуми со седиште во Охрид, професионално одговорија на поканата на ЦИВИЛ и известуваа за настанот. Регионалната ТВМ од Охрид, покрај прилогот, го покани и претседателот на ЦИВИЛ, Џабир Дерала во централниот ТВ дневник на оваа телевизија и објави извештај на веб-страницата. Изјавата на Дерала, за потребата од исполнување на сите предуслови за фер и демократски избори, проследена со информација за тоа како помина јавната дебата: “Сите за слободни избори“ во Охрид, исто така, беше пренесена од Ohridnews. Дебатата која помеѓу присутните се разви во Охрид, предизвика внимание и во националните медиуми, а во дел од провладините медиуми, за жал, некоиод изјавите беа користени и во манипулативни цели.

ЦИВИЛ на 2-ри февруари во Скопје организираше јавен настан „Плурализмот и политичката криза“ на кој учествуваа  политичките партии кои не се дел од преговорите за надминување на политичката криза. Единаесет лидери или високи претставници на политички партии и политички иницијативи, активисти од невладини организации, дипломати и претставници од пет амбасади беа присутни на настанот. За настанот известија две телевизии со национална концесија, 24 Вести и ТВ 21, а успешната јавна дебата беше проследена и од Интернет порталот Либертас.

Средбите со граѓанки и граѓани, јавните настани и дебати беа одржани во рамките на проектот „Слободни избори за слободни граѓан(к)и“ поддржан од Министерството за надворешни работи на Сојузна Република Германија.

Експертски мислења на членови на тимот на ЦИВИЛ, во изминатиот период беа барани од неколку медиуми, и беа дел од анализи, поврзани со политичките случувања во државата, со Договорот од Пржино, состојбата со медиумите и обезбедувањето на услови за фер и демократски избори.

Веб сајтот на радио Дојче Веле, во својата анализа: Дали Груевски “преку народот” го отфрла договорот од Пржино?, се повикува на изјавата на Дерала, според кој “популистичкиот говор на Груевски, во суштина, претставува гротеска и во други околности би можел да биде предмет на подбив. Но, не и сега.” Весникот „Нова Македонија“, во својот текст: “Проверка на избирачкиот список во три фази”, ги пренесе ставовите на ЦИВИЛ, за потребните промени во избирачкиот список: “Експертите-соработници на ‘Цивил ‘го поздравуваат напредокот во овој процес. ‘Цивил’ ќе ги поддржи сите чекори на ДИК за подобрување, прочистување и проверка на избирачкиот список...”

Телевизијата АЛСАТ-М, по упатеното писмо од невладините организиции до комесарот Јоханес Хан, разговараше со Дерала, за ставот на ЦИВИЛ, по прашањето дали треба да има избори на 24-ти април. Дерала, на истата тема, даде изјава и за националната телевизија 24 Вести.

Петрит Сарачини како претставник на ЦИВИЛ, на АЛСАТ-М, зборуваше за корупцијата што ја прави власта, и корумпирањето на медиуми со јавни пари.

ЦИВИЛ - Центар за слобода, продолжува да биде отворен за соработка со сите медиуми во Македонија.