Македонија: Преглед на настани (20 јули 2016)

Дневен преглед на најважните настани во Република Македонија (20 јули 2016 година): Талески на распит во СЈО || Горан Грујовски не е повеќе началник на Петтата управа || СЈО работи на предметот „Шпион“ || Основниот суд Скопје одби мерка за претпазливост за Јанкулоска || Протест во Тетово против дивата депонија  || Претставниците на политичките партии постигнаа договор  || Шекеринска: Договорот ќе обезбеди фер избори || Тодоров: Се надевам дека СДСМ ќе собере храброст да се соочи со граѓаните!

Талески на распит во СЈО

По два часа распит кај Катица Јанева, битолскиот градоначалник Владо Талески го напушти СЈО со старите ставови за случајот „Транспортер“ - дека се работи за наметнат процес со кој се прави политичка хајка против него. Талески еден месец е во домашен притвор, од каде беше спроведен со полициска придружба, а во зградата на СЈО влезе  без лисици на раце.  Битолскиот градоначалник од дома ја води Општината, потпишува документи кои курирската служба секојдневно му ги носи.

Горан Грујовски не е повеќе началник на петтата управа

Министерството за внатрешни работи, нема началник на Петтата управа, откако досегашниот началник осомничен во случајот „Тврдина“, Горан Грујовски е разрешен од позицијата, информираше на денешната прес-конференција министерот за внатрешни работи, Митко Чавков. Грујовски од оваа функција беше суспендиран од поранешниот министер за внатрешни работи Оливер Спасовски.

СЈО работи на предметот „Шпион“

Специјалното обвинителство ја привршува анализата со заклучоци за предметот „Шпион, обвинетите се надеваат дека на први септември Катица Јанева ќе ја објави вистината за првата шпионска афера во земјава - дали Кривичниот суд направил повреди во постапката. Дотогаш, од СЈО одлучија да не ги соопштат заклучоците. Во неизвесност се и адвокатите, што ќе се случува со „Шпион“ и пресудите за нивните 19 клиенти.

Основниот суд Скопје одби мерка за претпазливост за Јанкулоска

Судијата на претходна постапка при Основниот суд Скопје 1, Александра Поп – Стефанија одби да изрече мерка на претпазливост на ексминистерката за внатрешни Гордана Јанкуловска, која  е осомничена во случајот за незаконското уништување на опрема за прислушување познат како „Тврдина“, што го отвори Специјалното Јавно обвинителство (СЈО). Предлозите на СЈО се одбиени како неосновани, а во образложението на судијката се вели дека осомничената дала исказ дека уредно ќе се јавува на поканите од Судот.

Протест во Тетово против дивата депонија

Жителите од тетовската населба Деребој, денеска протестираа против дивата депонија која се наоѓа веднаш до нивната населба. Протестот се одржа пред зградата на Oпштина Тетово, каде беше и доставено писмо до градоначалничката Теута Арифи, со кое се побара санирање на депонијата. Симболично пред општинската зграда, демонстрантите фрлија ѓубре.

Претставниците на политичките партии постигнаа договор

„Имаме добри вести, постигнат е договор и партиите се согласија да продолжи имплементацијата на пржинскиот договор“, изјави американскиот амбасадор Џес Бејли, откако заедно со претставникот на канцеларијата на Европската унија и сопретставниците на политичките партии, по завршувањето на преговорите, сите излегоа насмеани од Клубот на пратениците. И двете отворени прашања за кои деновиве преговараа партиите се затворени, договорено е министерот за внатрешни работи да може да смени 15 раководители или началници, како и да спроведе 10 проценти кадровски промени по хоризонтала, а министрите од преодната влада по изборите, веднаш да си поднесат оставки.

Шекеринска: Договорот ќе обезбеди фер избори

„На почетокот на целиот овој процес ветивме дека овој пат во Македонија прво ќе инсистираме да има обезбедени услови за фер и демократски избори, а дури потоа ќе обезбедиме договор за датум на изборите. Тоа овој Договор го обезбедува. Дополнително ветивме дека сите еднострани потези коишто ги повлече Владата на ВМРО-ДПМНЕ и ДУИ ќе мора да ги повлечат. Тоа исто така го обезбедува овој Договор“, изјави претставничката на СДСМ на денешните преговори, Радмила Шекеринска. 

Тодоров: Се надевам дека СДСМ ќе собере храброст да се соочи со граѓаните! 

„Задоволен сум. Имаме договор. ВМРО-ДПМНЕ целиот овој период доаѓаше по договор. Баравме да се стави крај на оваа криза, којашто СДСМ ја наметна на оваа држава и ја одржуваше целиот овој период. Задоволен сум затоа што со овој договор се отвора можност да се организираат, фер, демократски, слободни, кредибилни избори на кои што ќе учествуваат сите и народот ќе одлучи кому ќе ја даде довербата“, изјави Никола Тодоров. 

ЦИВИЛ го објавува овој преглед на настани со цел да придонесе кон објективното информирање за настаните и процесите, но и за настани за кои еден дел од медиумите во Република Македонија не информираат или информираат многу малку. Вашето мислење е важно за нас. Ве молиме, вашите коментари, сугестии, информации, фотографии и видео прилози испраќајте ги на нашата Фејсбук страница или на e-mail: [email protected]к