Диригираните медиуми пак по старо: Послушните пропагандисти на власта едвај го дочекаа крајот на мандатот на ад-хок телото!

По завршувањето на изборите и престанувањето со работа на ад-хок телото за медиумско регулирање за време на изборниот процес, продолжи силната контрола на власта врз медиумите во Македонија. Уредниците на одделни диригирани медиуми, наместо непристрасно да известуваат, веднаш се вратија во добро им познатата улога на „службеници на Партијата“, создавајќи пропагандни содржини како маркетинг-агенти, пред сé на ВМРО-ДПМНЕ.

ЦИВИЛ Медиа побара изјави од неколку експерти за (не)професионалниот однос на медиумите кон изборите и за начинот на известување за време на кампањата, на изборниот ден и во постизборниот период.

Директорката на Совет за етика во медиумите на Македонија, Марина Тунева, за ЦИВИЛ Медиа вели дека политичарите преку медиумите се бореа да си го добијат „заслужениот простор“, а новинарството одигра улога на сервилен служител во таа намера. И притоа, медиумите не умееја да одлучат самите, туку дозволија тоа да го направат други во нивно име.

Марина Тунева, Совет за етика во медиумите

„За жал, доста медиуми паднаа на тестот на професионалноста и не успејaа да се ослободат од притисокот на политичката ситуација. Освен што се претворија во разгласни станици на политичките партии, својот простор го злоупотребуваа за да им го отстапат на политичките актери и на нивната агенда и пораки, па дури и кога тие содржеа потпалувачка и воинствена реторика. Остана перцепцијата што долго трае, дека етиката не е во сржта на работењето на медиумот, туку таа е само мисловна именка“, изјави Тунева.

Комуникологот Сефер Тахири, за ЦИВИЛ Медиа изјави дека Македонија се наоѓа длабоко на листата на неслободни медиуми, бидејќи на неколку медиуми има текстови со исти наслови, со исти теми, што покажува дека тие содржини доаѓаат од некоја партиски центар или пропагандна служба.

Сефер Тахири, комуниколог

„За жал, ова е вистинската слика за медиумите кај нас. Известувањето е еднодимензионално и еднонасочно. Се прават деструктивни теми, каде што се напаѓа опозицијата, невладините организации, критичките медиуми, сé со цел да се прикаже дека ВМРО-ДПМНЕ е вистинскиот победник на овие избори. Често, во одредени медиуми, има и говор на омраза, дискриминација, клевети..., кон неистомислениците на владејачката партија“, вели Тахири.

Снежана Трпевска од Македонскиот институт за комуникациски студии, за ЦИВИЛ Медиа изјави дека пред да започне изборната кампања, имаше еден привиден период на подобрување во медиумското известување за политичките актери. Таа додава дека тоа беше намерно направено, колку да се остави позитивен впечаток пред меѓународната заедница, особено како резултат на вториот политички договор од Пржино.

Снежана Трпевска, Македонски институт за комуникациски студии

„Провладините приватни медиуми дадоа многу повеќе простор во вестите за  опозицијата и 'го намалија' демонизирачкиот дискурс кон опозициските и другите критички гласови, а МТВ релативно балансирано известуваше за сите политички актери и теми. Но, како се доближуваше кампањата, така почна да станува јасно дека тоа навистина било само привид. Си се вратија на свое, што би се рекло. Повторно ја гледаме истата демонизирачка реторика кон опозицијата, еклатантното фаворизирање на партијата на власт и некритичкото пренесување на отворениот говор на омраза што доаѓа од највисоки политички функционери од власта“, вели Трпевска.

Дехран Муратов