Македонски
Shqip
English
Вo богатата агенда на Караванот на слободата, екипи на ЦИВИЛ – Центар за слобода, во четвртокот посетија неколку општини во Источна Македонија, во кои го промовираа целите на Караванот, делеа флаери и ги анимираа граѓан(к)ите за посета на мултимедијалниот настан во Штип во петок на 23-ти септември.
Паралелно, членовите на тимовите на ЦИВИЛ, разговараа со граѓанките и граѓаните за опструкциите при слободното изразување на нивната политичка волја и за важноста на слободата во нивното секојдневие.
Во руралните општини Карбинци и Чешиново-Облешево беше забележливо отуството на граѓан(к)и од помладите генерации за кои повозрасните соговорници со жалење истакнуваа дека масовно се иселуваат во соседните градови, во Скопје или во странство.
Слична беше приказната и во урбаните општини Свети Николе, Виница и Радовиш, каде соговорниците потенцираа дека најактуелно е масовното заминување на помладите сограѓани во Италија, каде со бугарски пасоши или „на црно“, берат грозје.
Караванот на слободата е тримесечен фестивал, кој ги користи уметноста и културата за да влијае на засилување на граѓанската свесност и граѓанкиот активизам. Тоа е динамичен мултимедијален проект, кој го поттикнува граѓанското учество во процесите на донесување одлуки на локално и национално ниво.
