КАВАДАРЦИ: СОЦИЈАЛНА ПРАВДА СЕГА!

Караванот на Иницијативата Социјална правда сега! денеска ќе одржи проекција на вести и дебата на плоштадот во Кавадарци, со почеток во 19 часот. ЦИВИЛ – Центар за слобода и Македонска платформа против сиромаштија ја поведоа оваа иницијатива, заедно со граѓански активисти и експерти од областа на човековите права и социјалната правда. Со цел да ги разоткријат тешките социјални состојби, кршењето на човековите и работничките права и да придонесат кон објективното информирање на јавноста, редакцијата ЦИВИЛ Медиа продуцира видео прилози за секој град посебно. По Штип и Велес, денеска на ред е Кавадарци.

Каква е состојбата во „прославените“ странски инвестиции, каква е социјалната положба на граѓанките и граѓаните, ставовите и анализите на синдикалците, експертите и граѓанските лидери, ќе проследиме во прилозите на вечерашниот настан во Кавадарци. Организаторите ги покануваат локалните медиуми и граѓанките и граѓаните на Кавадарци да дојдат на плоштадот и да ја искористат можноста да го искажат своето мислење и да споделат информации и лични искуства преку отворениот микрофон кој секогаш е на располагање кога ние организираме настани.

Имајќи ја предвид тешката состојба на медиумските слободи во земјата, Иницијативата СОЦИЈАЛНА ПРАВДА СЕГА! ја користи методолошката алатка Street Media на редакцијата ЦИВИЛ Медиа, која подразбира продукција и видео проекции на информативни содржини на плоштадите низ Македонија. Преку нив, јавноста може непосредно да се запознае со социјалните состојби во своите средини. На овие настани, присутните можат да учествуваат со прашања и коментари, на кои им одговараат претставници на граѓанското општество и експерти кои ги поканува нашата Иницијатива.

За иницијативата:

СОЦИЈАЛНА ПРАВДА СЕГА! е иницијатива на организации на граѓанското општество засегнати со растечките проблеми во сферата на социјалната правда во Република Македонија. Неа ја сочинуваат ЦИВИЛ – Центар за слобода и Македонска платформа против сиромаштија (МППС), активисти за човекови права и експерти. Иницијативата е поддржана од Фондација Фридрих Еберт.

Активностите на иницијативата се состојат во јакнење на јавната свест и застапување на работничките права, синдикализмот, подобрување на легислативата за нивна заштита и нејзина доследна имплементација.  Иницијативата СОЦИЈАЛНА ПРАВДА СЕГА! се залага и за заштитата на другите социјални и општествени категории како што се хонорарците, младите, стечајните работници, социјално загрозените и низа други социјални групи во општеството кои секојдневно се соочуваат со грубо кршење на нивните социјални права и со дискриминација од институциите на централно и локално ниво и работодавачите.

Иницијативата е отворена за организации, граѓански групи и поединци кои се залагаат за социјална правда.