Македонија: Преглед на дневни настани (15 јуни 2016)

Дневен преглед на најважните настани во Република Македонија (15 јуни 2016 година): Анализа: Ставрески остави пустош зад себе ||Собранието ја констатира оставката на Зоран Ставрески || Шарената револуција повторно на протест || СЈО не е надлежно за случајот "Тврдина"? || Европската Комисија смета дека не се спроведуваат реформите

Анализа: Ставрески остави пустош зад себе

Поранешниот министер за финансии и вицепремиер Зоран Ставрески, во изминатите девет години, постојано беше дел од тимот на ВМРО-ДПМНЕ, задолжен за економски прашања. За овој период, покрај тоа што во јавноста ќе остане запаметен по телефонските разговори со поранешната министерка за внатрешни работи, Гордана Јанкулоска, и изјавите кои се однесуваат на економските политики што ги води неговата партија: “Ние сме лудаци”, “Немаме за леб, а трошиме за чоколадо”, ќе остане забележан и во историјата на државата, за која толку многу се грижи партијата на власт, како министер во чие време јавниот долг на Македонија е зголемен дупло, односно,  од 23 отсто од бруто-домашниот производ во 2008 година, во првиот квартал од 2016-та година, достигна 45 отсто од БДП или 4,3 милјарди евра!

Собранието ја констатира оставката на Зоран Ставрески

Собранието на Македонија денеска ја констатираше оставката на вицепремиерот и министер за финасии Зоран Ставрески на почетокот на 106-та седница. На седницата на дневен ред ќе биде изборот на нови членови на Владата: Кирил Миноски, за министер за финансии и Илија Исајловски, за заменик-министер за надворешни работи откако вчера беше најавена смена на актулената заменик-министерка за надворешни работи Драгана Кипријановска.

Шарената револуција повторно на протест

„Ние сме лудаци!“ – гласеше една од пораките на денешниот протест на Шарената револуција. Активистките и активистите на ЦИВИЛ делеа чоколади меѓу демонстрантите, иронично парафразирајќи го сега веќе екс-министерот за финансии Зоран Ставрески: „Немаме за леб, а трошиме на чоколади!“

СЈО не е надлежно за случајот "Тврдина"?

Аболицијата на  Иванов го извади од домашен притвор началникот на 5та управа. За Горан Грујевски  кого  аболицијата го затекна во куќен притвор,  Кривичниот суд денеска одлучи дека не му одреди притвор  како што повторно побара Специјалното обвинителство.  Судијката Александра Поп Стефанија одлучила дека СЈО нема надлежност да ја води истрагата за „Тврдина“ бидејќи Катица Јанева не посочила од кој снимен разговор е произлезена истрагата за уништувањето на системите со кои било извршено нелегалното прислушување.

Европската Комисија смета дека не се спроведуваат реформите

Силни критики од состанокот на Комитетот за стабилизација и асоцијација меѓу Република Македонија и Европската унија кој се одржа денеска во Скопје. Европската комисија жали што реално не се спроведуваат итни реформски приоритети според планот направен на последниот состанок на Комитетот пред една година. Мора да се покаже нешто повеќе од намера за нивно спроведување, стои во соопштението.