Македонија: Преглед на настани (20 јуни 2016)

Дневен преглед на најважните настани во Република Македонија (20 јуни 2016 година): Македонија на дневен ред на Советот на ЕУ || Кривичниот суд ја прифати жалбата на СЈО || СДСМ поднесе кривична пријава против судијката Александра Поп Стефанија || 20-ти Јуни, Меѓународен ден на бегалците || ЦИВИЛ со поддрша за барањата на Шарената револуција || ГДОМ во одбрана на градоначалникот на Битола, Талески || Новинарот Кежаровски повикан на информативен разговор || Најмасовен протест на Шарената револуција

Македонија на дневен ред на Советот на ЕУ

Ситуацијата во Македонија е на дневен ред на Советот за надворешни работи на Европската унија на барање на Германија и Велика Британија. Се очекува европските министри да дадат препораки за политичката ситуација која се влошува. Германскиот шеф на дипломатијата Штајмајер изјави дека Европа ќе стори се за да се намалат тензиите и да се обезбедат услови за фер избори. Главниот проблем  е дека има недостаток на демократска култура на дијалог и дека ова немање на политичка култура се должи на позицијата на одредени „пријатели“ на Македонија кои ја „научија“ власта да не прави ниту внатрешни компромиси.

Кривичниот суд ја прифати жалбата на СЈО 

Кривичниот совет  ја прифати жалбата на СЈО за случајот „Тврдина“. Повторно ќе се разгледува барањето за мерка притвор за началникот на Петтата управа, Горан Грујевски,  ексминистерката за внатрешни работи Гордана Јанкуловска и уште четворица вработени во МВР. За тоа повторно ќе одлучува судијката Александра Поп Стефанија која минатата недела ги одби барањата на Специјалното обвинителство за притвори и, исто така, наведе дека ова Обвинителство не е надлежно за случајот „Тврдина“.

СДСМ поднесе кривична пријава против судијката Александра Поп Стефанија
СДСМ поднесе кривична пријава против судијката Александра Поп Стефанија. Според СДСМ, Одлуката на Поп Стефанија, да се прогласи СЈО ненадлежно околу случајот за уништување на опремата за незаконското прислушување е спротивна на законот.

Новинарот Кежаровски повикан на информативен разговор

Околу половина час пред почетокот на најавениот протест на Шарената револуција, новинарот Томислав Кежаровски беше на информативен разговор во полициската станица „Центар“. Но, поради недоразбирања меѓу полициските станици „Аеродром“ и „Центар“, не се знае за што конкретно е повикан Кежаровски на разговор?!

20-ти Јуни, Меѓународен ден на бегалците

По повод 20-ти Јуни, Меѓународниот ден на бегалци, Високиот комесаријат на ОН за бегалци – УНХЦР, објави дека во текот на изминатата година, бројот на бегалци и раселени лица во светот, кои избегале од конфликти и репресии, достигна рекорден број од 65,3 милиони лица.

ЦИВИЛ со поддршка за барањата на Шарената револуција

ЦИВИЛ – Центар за слобода ја упатува својата безрезервна поддршка на сите барања на Шарената револуција и ја поддржува ненасилната граѓанска акција против недемократската власт. Република Македонија нема повеќе време, ниту трпение за разбојничкото однесување на Груевски и неговата клика! Нема повеќе место за мизерните лаги на узурпаторите кои зборуваат за политички прогон против нив, додека тие се на власт и спроведуваат невиден партиско-полициски прогон на неистомислениците!

ГДОМ во одбрана на градоначалникот на Битола, Талески

Организирани со автобуси од другите градови, со знамиња на ВМРО-ДПМНЕ, стотици граѓани протестираа против одлуката на судот за определување мерка куќен притвор на битолскиот градоначалник Владимир Талески – осомничен во случајот „Транспортер“ на СЈО. На собраните им се обратија неколку членови на ГДОМ. Тони Михајловски изјави дека немаат бои во нивните џебови да ги шараат судовите, туку мирно ќе им дадат поддршка за нивното работење.

Најмасовен протест на Шарената револуција

Десетици илјади демонстранти од цела Македонија беа дел од Шарената револуција вечерва. Протестот започна од Специјалното Јавно обвинителство во Скопје, а демонстрантите потоа се упатија пред Владата, каде дел од активистите и членови на опозицијата држеа говори пред граѓаните. Учесниците во Шарената револуција ги повторија двете приоритетни барања, па продолжија пред Собранието. Дел од демонстрантите сакаа да изведат герила-акција со споменикот на Прометеј, но беа спречени од бројни сили на полициските специјалци.

ЦИВИЛ го објавува овој преглед на  настани со цел да придонесе кон објективното информирање за настаните и процесите, но и за настани за кои еден дел од медиумите во Република Македонија не информираат или информираат многу малку. Вашето мислење е важно за нас. Ве молиме, вашите коментари, сугестии, информации, фотографии и видео прилози испраќајте ги на нашата Фејсбук страница или на e-mail: [email protected]