Македонски
Shqip
English
Лидерот на ВМРО-ДПМНЕ, Никола Груевски, по враќањето од свадбата во Сицилија, Италија, веднаш започна со теренските активности низ општините, пред се, низ руралните средини во Македонија - но, со „премиерски“ третман во провладините медиуми, и со репризирање до бесвест на пропагандната серија „Остваруваме“ - втора, трета, четврта епизода... – за преродбеничките успеси на „градителите“ на селски игралишта и на „капацитети за преработка на свежи, суви или смрзнати земјоделски производи!“
Најавата на Фејсбук-страницата на Никола Груевски за неговата посета во Прилеп и Македонски Брод, на 21 јули 2016 година, како да е препишана од весникот „Борба“ од педесетите години на дваесеттиот век во СФРЈ, или преснимена од кино-журналите на „Филмски новости“ од некоја деценија подоцна... Фалбоспеви за неприкосновениот и безгрешен Водач.
Ја објавуваме интегралната верзија без лекторско-коректорски интервенции:
„Увид во активности при изградба на експресен пат “Градско - Прилеп” (после Росоман, пред тунелот за на кај преминот Плетвар). Отворање на фабрика за автомобилски делови на компанијата “Гентерм” во Прилеп. Посета на изграден локален пат во с. Волково, О. Прилеп. Посета на реконструираното интерно одделение во Општа болница Прилеп. Увид во активности при реконструкција на Градски стадион “Гоце Делчев”, Прилеп. Увид во активности при изградба на спортска сала во ОУ “Добре Јованоски” во Прилеп. Увид во активности при изградба на канализациони системи во Прилеп. Посета на новоизградени улици и увид во активности при изградба на плоштад, како и ќе оствари средба со жителите на с. Големо Коњари, О. Прилеп. Посета на реконструиран локален пат с. Лаг - с. Могилец, О. Македонски Брод. Беше посетен новиот пат за Могилец кој во должина од 3,5 километри е реализиран со средства од Агенцијата за финансиска поддршка на руралниот развој и Општината, во вкупен износ од 18 милиони денари. Посета на реконструирани улици и увид во активности при изградба на повеќенаменско игралиште и ќе оствари средба со жителите на с. Самоков, О. Македонски Брод...“
Речиси неверојатно: во Македонија, во 21 век! Популистички пристап, речник и пораки од едноумието. Времињата, пред години.. И сега, навистина ли некој треба да се обидува да ги коментира киднапираните институции, партизацијата на државата и за злоупотребите на државните ресурси во партиски цели? Што да се каже по маркетиншката порака - дека се издвоени 40 милиони денари, од кои досега е изграден пат кој порано речиси наликувал на козја патека, „дека се асфалтирани и 600 метри улици во износ од 10 милиони денари во село Самоков до новата населба Сувенир“...
Колумнистот Ерол Ризаов резигнирано резимира „тажно е да гледаш на вести како лидер на партија, од село во село, нé задолжува нас и нашите деца за себепромоција... Во кој тоа пишан, или непишан закон, или во која демократска држава може претседател на партија немилосрдно да го празни буџетот во предизборна кампања. Не знам за вас, ама мене ми е многу тажно што нон-стоп се емитуваат вести за еден партиски лидер и бивши премиер, како со наши пари дели социјална помош, пензии, субвенции, како гради споменици и плажи, патишта и училишта, фискултурни сали и игралишта, како да се тоа негови лични пари и проекти.
Нема кој да му каже во партијата, па и во државата, дека тоа не е работа на претседател на една политичка партија. На очиглед на целата јавност се редат пред камерите партиски активисти, од деца до возрасни луѓе во години, кои се поклонуваат до земја од благодарност кон големиот водач и учител што ги посетил и пратил булдожери да асфалтираат пат, по десет години откако е на власт. По овие успеси, благодарение на сенародниот идол, следуваат вестите за домашните предавници и непријатели. И ајде сега, некој нека каже дали се можни реформи во медиумите со истите луѓе кои од нив направија монструми. Да видам, не верувам“, истакна Ризаов.
А агендата на лидерот на ВМРО-ДПМНЕ и „премиер зад кулиси“ е исполнета до последната минута... Доволно е да се читаат панегириците на неговите ПР-мајстори.
На 10-ти јули 2016 Груевски бил во посета на Општина Кривогаштани каде имал средби со граѓаните, при што извршил и увид во започнатите активности и во инвестициите - завршеното игралиште и спортската сала.
„Три нови инвестиции се на повидок во Општина Кривогаштани. Едната е за преработка на земјоделски производи и е вредна околу 1,5 милион евра, втората инвестиција е исто така, за преработка, но за суви и смрзнати земјоделски производи и е инвестиција вредна околу еден милион евра од наш иселеник кој потекнува од овој крај. Третата инвестиција е онаа на компанијата ‘Везешари’ која вкупно е вредна околу три милиони евра. Многу е важно што овие три инвестиции заедно, само оваа година, ќе имаат околу три милиони евра инвестиција и околу 100 вработени“.
Истиот ден, Груевски ја посети и Општина Крушево, но пред да пристигне во градот, локалните партиски активисти на Унијата на млади сили на ВМРО - ДПМНЕ, насилно го отстранија транспарентот од зградата на Општинскиот комитет на СДСМ Крушево, на кој пишувало „Шутка не ти бега, Никола!“. Таа вест, нормално, не ја објавија провладините медиуми.
Утредента, на 11 јули 2016, Груевски направи пауза во крстосувањето низ Македонија, за да оствари средба со Викторија Нуланд, помошник државен секретар на САД за европски и евроазиски прашања, но веќе на 12 јули, претседателот на ВМРО-ДПМНЕ најде време да ги повика градоначалниците и министрите, да разговараат за „прогресот на решавање на барањата на граѓаните, произлезени од теренските посети“.
Според темелните хроничари на неговите тури, на 13 јули 2016, Груевски веќе бил на посета на Долненско при што извршил увид на: „Камен-темелник за изградба на локален пат с. Дупјачани - с. Небрегово. Увид во активности при реконструкција на Дом на култура Ропотово, изградба на повеќенаменско игралиште и средба со жителите на Ропотово. Увид и во активности за изградба на регионалниот пат с. Ропотово - с. Црнилиште - с. Лажани. Посета на реконструираниот монашки конак и партерно уредување во Манастирскиот комплекс „Св. Преображение” во с. Зрзе и посета на патниот правец с. Костинци - с. Зрзе - Манастир ‘Св. Преображение’”, а на 14 јули, остварил работен состанок за проектот „Купи куќа за млади.
На 15 јули, Груевски бил во посета во Лабуништа каде што ветил (пред договарањето на датум за предвремени избори) дека на жителите конечно ќе им се изгради спортската сала. Груевски потсетил дека во минатото два пати бил поставуван камен-темелник за изградба на спортска сала во Лабуништа на неподготвен терен и без дозволи, а сега тоа било средено и бил потпишан и договор за градба. Тој рекол дека за реализацијата на проектот имало проблеми со дозволи од Општината поради што бил изменет Законот за градење, со цел да се издејствува да почне градбата. Според партијата, изградбата на салата и амбулантата биле најголемите барања на жителите на Лабуништа и „со промени на закони и преземање на сите можни мерки се реализираат овие два капитални проекта“.
Истиот ден, Груевски ја посети и општината Вевчани каде што во моментов се работи на девет различни проекти, меѓу кои уредување на шеталиштето на кејот на Вевчанска река, кружен пат околу селото, како и партерно уредување во рамки на новоизградениот образовен центар во селото, во чии рамки функционираат основното училиште, повеќенаменска спортска сала и детска градинка, инвестиција во вредност од 250.000 евра.
Експремиерот Груевски на 21 јули оваа година, истакна дека со отворање на американската фабрика „Гентерм“ во Прилеп ќе се стабилизира економијата и ќе се вработат тие што се невработени.
„Денес стартува со работа фабриката на американскиот инвеститор „Гентерм“ која е сместена во Прилеп. Ветено и остварено. Инвестиција вредна 26 милиони евра која треба да вработи околу 2.000 луѓе, што значи сигурна егзистенција, стабилност и можност за планирање на иднината за 2.000 семејства. Се работи за глобален бренд кој произведува автомобилски компоненти за светски брендови како Mercedes, BMW, Volkswagen, Ford, Fiat и други, глобална компанија присутна на три континенти со над 10 илјади вработени“, потенцираше Груевски пред прилепчани.
Груевски при посетата на Општината Прилеп, истакна дека власта на ВМРО-ДПМНЕ во изминатите десет години реконструирала над 450 училишта во Република Македонија и вложила над 50 милиони евра во подобрување на образовната инфраструктура во земјава.
Груевски при посетата на Прилеп истакнал и дека болницата била една од најзапуштените во Македонија затоа што од 1980 година кога е пуштена во употреба, досега не била направена никаква реконструкција. „Во меѓувреме и помогнавме на болницата да и се деблокира сметката која беше блокирана и веќе реконструкцијата е во една длабока фаза“, се пофали Груевски, кој како лидер на владеачка партија, „извршил и увид во работата на експресниот пат Прилеп - Градско и на новиот канализациски систем до целосен третман на отпадните води“.
Но, на успесите им нема крај. „Повеќе од 22 крупни инвестициски зафати ќе се реализираат во Охрид во наредниот период. Дел од нив се во тек, а реализацијата на останатите ќе почне наскоро, информира лидерот на ВМРО-ДПМНЕ Груевски при посетата на Охрид, на 23 јули 2016 година. Двете најголеми инвестиции што ќе ја одбележат оваа градежна експанзија се изградбата на Светиклиментовиот универзитет на Плаошник и изградбата на автопатот Охрид - Кичево, чија реализација треба да заврши кон крајот на 2018 година.
„Освен културниот дел се подготвуваат и проекти кои ќе значат многу за Охрид, меѓу кои е и изградбата на две или трикатни гаражи кои треба да ги гради Акционерското друштво за изградба и стопанисување со станбен и со деловен простор од значење на Републиката (АДСДП) и МЕПСО. Ќе се градат пешачки патеки од центарот на градот до ‘Свети Јован Канео’ и ќе продолжи до плажата Лабино, здравствен дом, марина, во напредна фаза е изградбата на Специјалната болница за ортопедија и трауматологија ‘Св.Еразмо’, како и базенот. Ќе се гради и автобуската станица, Центарот за култура, театарот…“, истакна Груевски.
Партискиот лидер ги задолжи општинските власти да се заземат за обезбедување на потребната документација за изградба на уште две спортски сали. Едната во ОУ „Кочо Рацин“, а другата е во рамки на новиот универзитетски кампус на Факултетот за информатички науки и технологија лоциран во старата касарна. За изградбата на Конгресниот центар, има објавено тендер но досега никој не се јавил. Исто така, ќе се градат и две тениски игралишта.
По десетте години на разните кабинети на Груевски, населените места во охридско, ќе добијат и лекар. Од 1 август стартува со работа руралниот лекар во Пештани, кој таму ќе работи три дена во седмицата, а по еден ден седмично ќе ги покрива населените места Трпејца и Љубаништа.
На непресушниот список на предизборните подароци на граѓаните, се најде и најавата на Груевски за нови 280 работни места во фабриката на „Кранфилд Фаундри“ која се наоѓа во индустриската зона Неокази во Пробиштип, при поставувањето камен-темелник на новата фабрика за производство на делови за монтажна, железничка и автомобилска индустрија на фирмата,, инвестиција вредна 15 милиони евра. Во тој крај, Груевски се запознал и со работите на санацијата на свлечиштето на регионалниот пат Пробиштип - Крупиште.
„Минатата година имавме поплави во државата кои беа најголеми во последните 40 години. Владата излезе многу во пресрет на граѓаните особено на земјоделците во обесштетување и тоа стопроцентно. Но истовремено се обративме до ЕУ и побаравме помош во делот на инфраструктурата бидејќи освен земјоделците и индивидуални куќи на граѓаните, имаше оштетувања и на инфраструктурата. Од Брисел ни беа одобрени 10 милиони евра и работата на ова свлечиште е финансирана токму од тие средства“, рече Груевски.
Вчера Груевски беше на отворањето за сообраќај на проширениот дел од булеварот „Партизански одреди“ во Скопје, а денес е во Општина Илинден на поставување на камен-темелник на фабрика за дизел-гориво... Следуваат нови продолженија... Ќе се распишуваат ли тендери за црвени ленти и ножици? Ќе има ли Груевски здив ем да ги „строи“ градоначалниците, ем да се сретнува со инвеститорите, ем да го насочува в.д. премиерот, ем да се фали во медиумите, ем да се задолжува секој вторник по дома, ем да ги распределува стотиците од евробврзницата...? Како ли ќе ја издржи напатениот народец бескрупулозната пропаганда, откако ќе започне законски предвидениот рок за предизборна кампања?
Дехран Муратов
Синиша Станковиќ
