Македонски
Shqip
English
ЦИВИЛ Медиа со министерот за надворешни работи Никола Попоски и со министерот за правда Аднан Јашари, и покрај повеќето обиди на новинарите, во текот на триесеттина денови, не успеа да договориме интервју.
Прашањата кои беа предвидени и му беа доставени на министерот Јашари се следните:
- Испитувањата на јавното мислење во Македонија, покажуваат дека довербата на граѓаните во судството и во судиите е на најниско ниво, а итните реформски приоритети посочени во последниот извештај на Европската комисија, се посветени токму на правосудниот систем во Македонија. Што досега е реализирано од тие препораки и кој е вашиот план за блиска иднина (во наредните три месеци до изборите)?
- Во јавноста е неподелено мислењето дека во Македонија сѐ уште има политички затвореници. Освен тоа што деновиве за два случаја („Сопот“ и „Монструм“) побаравте да ги преземе Специјалната јавна обвинителка, што друго ќе преземете за да се ослободат политичките затвореници и дали тоа ќе се случи во предизборниот период?
- Во врска со многуте информации и шпекулации за кризата во Куманово, рековте дека имате можност и право да побарате од надлежните инсититуции и органи да се утврди дали тие се вистинити или не. Дали го направивте тоа?
- Колку овие случаи може да се користат во предизборната кампања и што ќе направи Министерството за правда за да ја оневозможи нивната дополнителна политизација во контекст на изборите?
- Дали, според вас, во Македонија се создаваат услови за слободни избори и кои се преземените мерки? Што, вие, како министер за правда правите за да се создадат такви услови?
ЦИВИЛ - Медиа ги подготви следните прашања, кои ќе му беа испратени на министерот Попоски, ако успеевме да воспоставиме нормална комуникација:
- Во постојана комуникација сте со претставниците на меѓународната заедница. Со кои аргументи ги убедувате дека Македонија може да се справи со длабоката политичка криза во која се наоѓа веќе подолг период?
- Како меѓународната заедница гледа на кризата во која се наоѓа Македонија, кои се нивните очекувања за изборите закажани на 24-ти април и дали Македонија може да ги оправда? Дали сметате дека со досега стореното на планот на реформите, во Македонија се создадени услови за да се обезбедат фер и демократски избори?
- Неодамна остваривте официјална посета на Грција, на покана на грчкиот министер за надворешни работи на Грција, Никос Коѕијас. Дали соработката со Грција се интензивира и може ли да се очекува напредок во преговорите за името?
- Членството во НАТО продолжува да биде еден од стратешките приоритети на Република Македонија. И покрај тоа, Црна Гора веќе доби покана за членство, а Македонија како да не е на агендата. Која е вашата стратегија за повторно враќање на Македонија во фокусот на НАТО?
- Македонија е дел од „Балканската рута“ по која илјадници бегалци ја поминуват секој ден. Со какви предизвици се соочува Македонија поради кризата и каква е соработката со соседните и со другите европски држави?
И покрај многубројните неуспешни обиди, ЦИВИЛ останува отворен за понатамошна соработка со министрите Попоски и Јашари, и доколку постои интерес кај нив, и во наредниот период, ќе им овозможи простор да ги пласираат своите ставови.
Првата шанса за тоа е веќе во февруари кога ЦИВИЛ ќе продолжи со втората серија на интервјуа со министри. Со челниците на ресорите внатрешни работи и труд и социјална политика, ќе разговараме за напредокот во активностите кои беа посочени при првиот разговор и за предизвиците со кои се соочуват, како и за позитивните или негативни промени во нивните министерства, а со двајцата министри од редовите на владеачките партии би го отвориле дијалогот за подобрување на состојбите на политичката сцена и за надминување на долгогодишната криза.
