Рамуш Мухарем: Се’ се сведува на контрола и цензура на медиумите

По повод Светскиот ден на слободата на медиумите прашавме неколку видни новинари да го изразат своето мислење во врска со состојбата со медиумите кај нас. Рамуш Мухарем, новинар на веб-потралот РОМА ТАЈМС, а кој порано работеше во телевизиите ТВ БТР и ТВ Шутел, смета дека ромските медиуми се целосно контролирани:

Со затворање на БТР Национал, се затвори уште повеќе и гласот на „тивките Роми“! Со гаснење на овој медиум згаснаа и последните надежи и желби за општествена трансформација, интегрирање во општеството на најмаргинализираната заедница во државата - Ромите. И пред да згасне овој медиум, БТР се соочуваше со некој вид на „лимитиран“ и „полуконтролиран“ производ, емисии, прилози и слично кои мораа секогаш повеќе пати да се „испеглаат“ пред да се пласираат во јавноста. И денеска состојбата не е ништо поинаква. Се’ се сведува на еден вид на „контрола и цензура“. Сега најголемиот процент на медиуми се во едно лошо апологетско новинарство и тешко е да се бори човек со такво новинарство преку асоцијации, здруженија и слично. Ова аналогно исто така ја покажува и моќта на ромскиот глас, кој сега е многу послаб или воопшто го нема. Во моментот исто така функционираат и два ромски веб портали Роматајмс.њуз и 24 Вакти. Тие се се’ уште на почеток и ја немаат таа доволна афирмација, но сепак се превземаат чекори за нивна афирмација и поголема презентација.

ЦИВИЛ - Центар за слобода покани неколку експерти и уредници да дадат свое мислење за состојбите со слободата на изразувањето и медиумските слободи. Овој серијал е дел од проектот за изборен мониторинг - Напред!, финансиран со германски средства од Пактот за стабилност на Југоисточна Европа.