Македонски
Shqip
English
Џабир Дерала, претседател на ЦИВИЛ – Центар за слобода се сретна со Зоран Заев, претседател на СДСМ на 9 март, доцна попладне, со цел од прва рака да се запознаат меѓусебно со актуелните активности и напорите за надминување на кризата во земјата. На самиот почеток на средбата, претставникот на ЦИВИЛ му ги достави двата опширни извештаи „Слободни избори: Услов за кој не се преговара“ и „Избори 2016“, како и препораки кои произлегуваат од долгорочниот мониторинг на изборите, политичкиот процес и човековите права.
На средбата стана збор и за процесите и преговорите за формирање на влада, за опструкциите и манипулациите во јавноста, како и за потребата за транспарентност на процесите и предизвиците во овој период. Притоа, лидерот на СДСМ отворено и во детали говореше за актуелните процеси и ја поддржа заложбата за потполна транспарентност на сите чекори во овој правец.
Во името на ЦИВИЛ, Дерала ги повтори заложбите и повиците на организацијата за итно продолжување на работата на Собранието и формирање влада која ќе се зафати со итни реформи и суштински проблеми, да се обноват интегративните политики на земјата на внатрешен и надворешен план, а како важен сегмент, се истакна и потребата од максимална поддршка на работата на Специјалното јавно обвинителство (СЈО).
На средбата Заев – Дерала се претставија и наодите на ЦИВИЛ за постизборната злоупотреба на јавните ресурси, администрацијата и медиумите, за национализмот, поделбите и политичката дискриминација, како и за локалните избори.
Дерала потсети и на низа други препораки во текот на постизборниот период како што се барањата институциите да ги земат предвид наодите и препораките од изборниот мониторинг на ЦИВИЛ и да спроведат итна истрага за нерегуларностите, одговорност од ДИК за големите пропусти во спроведувањето на изборниот процес, како и итна ревизија на Избирачкиот список.
ЦИВИЛ е на располагање и на други политички партии, како и на релевантните институции, да ги претстави своите наоди и препораки кои произлегуваат од мониторингот и анализите на изборниот процес и напорите за надминување на политичката криза во Република Македонија.
