Уметниците на Караванот на слободата ги воодушевија струмичани

На 11-ти август, Караванот на слободата го одржа вториот мултимедијален настан. На три иполчасовниот концерт во Струмица, групите Mooger Fooger, Wipe Out и Sethstat ги забавуваа струмичани  во Градскиот парк. Покрај музиката на слободата, на поетскиот перформанс се читаа стихови на слободата, а се одржаа и ликовната работилница и изложбата на уметнички дека под заеднички наслов „Слобода во боја“.

На мултимедијалниот настан во Струмица се донираше и хуманитарна помош за настраданите од поплавите во скопскиот регион.

Настанот започна во Домот на АРМ со дебата на тема „Македонија: со или без слобода“, на која учествуваа експертката за човекови права Мирјана Најческа, новинарот и поет Ѓорѓи Калајџиев и активистката Ленче Христова. Дебатата ја водеше уредникот на ЦИВИЛ Медиа, Синиша Станковиќ. Посетителите имаа можност да слушнат повеќе ставови на темата, да поставуваат прашања и да дадат свои видувања за состојбите со човековите права и слободи во земјата.

Од Домот на АРМ, активностите се префрли на големата сцена во Градскиот парк, каде се обрати претседателот на ЦИВИЛ, Џабир Дерала, кој им оддаде почит на загинатите од поплавените подрачја.

Потоа присутните уживаа во стиховите на слободата на Митко Гогов, Ѓорѓи Калајџиев и Наташа Василевска Трајческа.

Во текот на целиот настан активна беше ликовната работилница на академскиот сликар Мирослав Стојановиќ, на кој учествуваа и посетителите.

За добра музика и забава тука беа струмичаните Wipe Out, кои одлично ја загреаа атмосферата.

По домаќините, на сцената настапија македонскиот џез бенд Sethstat и популарните Mooger Fooger.

Концертот во Струмица беше втор од деветте големи мултимедијални настани кои Караванот на слободата ќе ги одржи до крајот на септември, во седум големи градови во земјата. Целта на Караванот е преку влијанието на уметноста да ја разбуди граѓанската свест и граѓанското учество во процесот на донесување одлуки на локално и национално ниво.