За мајмуните и за луѓето...

Дали за скопските власти животот и комфорот на едно шимпанзо, навистина вреди повеќе од опстанокот на стотици Роми!?

Стотина Роми, меѓу кои десетина дечиња, останаа на улица откако Град Скопје и Министерството за труд и социјална политика, со асистенција на полицијата, со багери им ги урнаа импровизираните куќички под Кале, на брегот на Вардар. Вљубениците во барок, премногу ги иритираа куќарките од ќерпич и картони на сиромашните Роми.

Пишува: Дехран Муратов

Иронијата да е уште поголема, додека јавноста дебатираше дали требаше или не да се урнат живеалиштата на Ромите под Кале, од Зоолошката градина во Скопје известија дека ќе се гради живеалиште за шимпанзо, кое ќе чини околу 230.000 евра, но за дополнителни информации, сепак, ќе треба да се произнесе Град Скопје... Дали во Македонија, навистина, едно шимпанзо вреди повеќе од животот на десетина деца кои сега живеат под отворено небо?

Образложението на градоначалникот на Скопје, Коце Трајановски е дека се урнати дивоизградени бараки на Ромите, затоа што тие наводно, имале и друго место на живеење, дека куќарките не биле безбедни за граѓаните, дека имало депонија и дека уривањето го побарал сопственикот на парцелата...

Еве, да знаев дека има смисла, ќе го повикав градоначалникот, самиот да покани медиуми и да ги посети „другите живеалишта“ на „богатите“ Роми кои се до неговата интервенција (сосе багерите) го живееја својот импровизиран живот покрај Вардар. Ако се расположени надлежните институции да ме повикаат, ќе им бидам водич на функционерите и на медиумите во неколку ромски маала, чисто да им покажам колку „убаво“ живеат скопските Роми, без вода, без електрична енергија, без никаква инфраструктура...

Пред некоја година, се запалија неколку ромски куќи во Скопје, во Тенеќе маало. Ромските политичари истрчаа да бидат хумани и секако, да искористат некој политички поен, при што експресно од Владата на Република Македонија беа издвоени околу 250.000 евра за реконструкција на куќите. Најголема заслуга за тоа имаше пратеникот Амди Бајрам. И секако, на следните избори имаше најголема поддршка од ромските гласачи во Шуто Оризари. Ама, барем помогна... Дали и сега, пред избори, ќе има ромски „херој“ што ќе им обезбеди покрив на стотината избркани Роми...?

Лани, додека „бранителите на татковината“ кампуваа пред Собранието на Република Македонија, од Унијата на млади на Сојузот на Ромите, им носеа пакети со јадење и пиење како хуман гест, ете, дека спиеле под шатори во „Жена парк“. Ромите од Кале веќе неколку дена спијат на улица, меѓутоа од Унијата на млади на СРМ, од ДСР, од ПЦЕР, од РОМ..., сé уште нема информации дека некој им однел некакви прехранбени производи. Навистина,. лидерот на ПЦЕР, Самка Ибраимовски на 2 август, на својот Фејсбук профил ги повика граѓаните, посебно Ромите, и на востание... И неколку невладини организации се трудат на некој начин да им помогнат на Ромите од Кале, но најголемиот дел од ромскиот невладин сектор е на летен одмор или одржува летни школи за зајакнување на ромските права. Се надевам дека по одморите, пред Нова година, на пример, ќе имаат јасна цел, секако и проект, како да делуваат на терен, а сé дотогаш, ќе бидат само Фејсбук - активисти, аналитичари и критичари...

Коцката е фрлена, ромските куќички се урнати, останува да видиме дали институциите конечно ќе преземат конкретни мерки и ќе им најдат соодветно сместување на Ромите, или ќе продолжат оправдувањата „дека Ромите не сакаат да одат во (не)безбедниот прифатен центар ‘Чичино село’“.

Една од обврските на Владата со потпишување на Декадата на Ромите е и – нивното вдомување. Може ли власта, да продолжи да води сметка за животните, конкретно и за мајмуните, и за најконкретното шимпанзо (иако, и со решетки од 230.000 евра, кафез е кафез, подобро е шимпанзото да остане на слобода), но, само со дел од парите за мајмунот, да ги реши проблемите барем на стотината Роми? Може ли? Може ли Македонија да се врати кон нормалната живеачка?